Преку Клубот на извозници како изложувачи настапија компаниите: „Агро Фила“ Штип – производител на масла за јадење, лековити масла и други производи од програмата за здрава храна, „Алмакс“ Струмица - производител на сончогледово масло за јадење,  „Лапе Фунги“ Демир Хисар – производител на различни видови на печурки и други шумски плодови и „Интегро Макс“ Пробиштип - производител на различни видови на брашно и други интегрални производи.

Целта на нашите активности е да ја зголемиме видливоста на македонските извозни компании на регионалните и глобалните пазари и да обезбедиме поголема меѓународна препознатливост на македонските извозни производи преку различна форма на промоција која вклучува: учество на меѓународни саеми и манифестации, Б2Б форуми, купувачки мисии и користење на дигитални алатки за поголема промоција и соработка.

Клубот на извозници во рамки на новиот концепт на Комората фокусиран на извозниот сектор во наредниот период преку конкретна соработка со надлежните државни институции и меѓународни донатори ќе работи активно на обезбедување техничка, стручна и финансиска поддршка за домашните извозни компании со цел поголема промоција на нашите компании и производи на регионалните и странските пазари. Еден од нашите стратешки партнери во оваа мисија за промоција на домашните извозни компании и производи е Министерство за земјоделство, шумарство и водостопанство со кое во иднина заеднички ќе работиме на конкретни програми и активности за промоција на македонските извозно ориентирани компании и производи од прехранбениот сектор како еден од стратешките извозни сектори за нашата земја.