За да не се дозволи повторен економски шок кај компаниите кои се главниот носител на македонската економија, Стопанската комора на Северна Македонија ќе излезе со конкретни предвидувања на истите, но и решенија кои навремено треба да се преземат со цел да се избегне уште една енергетска криза која би била фатална и за компаниите и за економијата во целина. Ова е еден од заклучоците што беше донесен на седниците на Управниот одбор и на Собранието на Стопанската комора на Северна Македонија што беа одржани вчера. Ваквиот заклучок следува откако пред двете највисоки тела на Комората беа презентирани резултатите од спроведената анкета за загубите кои ги претрпеа компаниите членки на Комората во енергетската криза 2022 година.
Конкретните предлог мерки и решенија ќе бидат утврдени на специјалната седница на Управниот одбор на Стопанската комора на Северна Македонија со Македонската енергетска асоцијација (МЕА) што е закажана за последната недела од април.   
Управниот одбор и Собранието на Комората го усвоија и извештајот за спроведувањето на годишната програма за работа на Комората во 2022 година. Истовремено се прошири и структурата на Комората и беа донесени неколку кадровски решенија, со чие визионерство, иновативност и тимска работа го трасираме нашиот пат кон градење на Комората на иднината.